Старата чаршија во Битола се смета дека започнала со основањето на вакафот на Сунгур-Чауш Бег во раниот 15-ти век. Тогаш биле изградени важни објекти како џамија, медреса, мектеб и имарет, кои го обележале и зачетокот на битолската чаршија.
Својот најголем развој чаршијата го доживува од средината на 19 век кога имала над 30 наменски пазари, како Ат-пазар, Пекмез-пазар, Мас-пазар и Дрвен пазар, а бројот на дуќаните, магазите и работилниците надминувал 2500.
Денес, Старата чаршија во Битола е во далеку помал обем и опфаќа околу 600 дуќани од различен тип и градски пазар.
Старата битолска чаршија, со својата динамика, архитектура и дух, останува траен симбол на историјата и животот во Битола, и продолжува да биде инспирација за сите кои ја посетуваат.
